In nov cudesch da lectura per rumantsch grischun
Mintga di è il titel dal nov cudesch da lectura per Rumantsch Grischun. 14 scriventas e scrivents da tuttas generaziuns e regiuns han contribuì cun texts tar divers temas a quest cudesch che furma cun ils fotograms in artg plain sentiment, variaziun e tensiun.
Ina cumparsa speziala
Quest cudesch cun dies liber cumpara sco rimnada da carnets. Ils fascichels cun ina cuverta colurada èn deditgads mintgamai ad in tema: Viadis, regurdientschas, nova vita, tats e tattas, relaziuns, destin, temp, muments – temas che ans occupan mintga di, las auturas ed ils auturs han però tschernì libramain lur tema. Ils texts per part fitg persunals èn vegnids scrits en rumantsch grischun. Mintga fascichel ha in’autra colur e vegn accumpagnà d’illustraziuns en furma da fotograms.
Quai che dura, bain madira
Il project d’in “cudesch da leger cun agids” en RG è vegnì preschentà gia l’onn 2002 a chaschun dal ventgavel anniversari dal RG. Anita Simeon e Theres Jörger han vulì far insatge ludic e captivant per la generaziun ch’era anc betg vegnida confruntada cun il RG en il temp da scola, tenor il motto: “Quai na chapesch jau betg” datti betg. Previs era ina publicaziun cun in curs da crash grammatical ed ortografic. Oz è la situaziun dal RG in’autra, meds dad RG datti per mintga sort da diever, uschia è l’idea dal project original vegnida adattada. Sin bunamain mintga pagina dal cudesch ‘mintga di’ datti pleds che vegnan
preschentads en tuts ils idioms ed en tudestg. Pleds ch’èn u relevants per chapir l’istorgia u pleds ch’èn per propi fitg differents dad in idiom a l’auter. L’expressiun tudestga è agiuntada perquai che la Quarta Lingua è daventada partenaria da quest project e basegna mintga carnet singul per lur commembers
novs da l’uniun.
Partenaris dal project da publicaziun ‘mintga di’
Las iniziantas èn Anita Simeon e Theres Jörger, ellas han furnì l’idea fundamentala. Ensemen cun la
Chasa Editura Rumantscha e la Quarta Lingua è il concept vegnì adattà e realisà.
Il correctorat dals texts ha la Lia Rumantscha contribuì.
Scriventas e scrivents
Maria Cadruvi
Silvio Camenisch
Rita Cathomas-Bearth
Aita Dermont-Stupan
Dominique Dosch
Flavia Hobi
Fadrina Hofmann
Chatrina Josty
Myriam Pelican-Camenisch
Viola Pfeiffer
Tinetta Rauch
Eva Riedi Collen
Claudio Spescha
David Spinnler
Vernissascha
La vernissascha da quest cudesch ha lieu sonda, ils 7 da november 2015, a las 11h00 en il rom dals
Dis da Litteratura a Domat.
Il cudesch po vegnir retratgs en las librarias e sut www.chasaeditura.ch, el ha 128 paginas, cuntegna
texts da 14 scriventas e scrivents, è illustrà e custa CHF 24.00.
